Sur la requeste faicte par Jehan Bouchier le Jeune sergent royal et ordinaire en la court de ceans
en la presence de maistres Jehan Brisson, substitut de l’advocat du roy, Jacques Danyau
procureur dud. seigneur et maistre Pierre Mallet, susbstitut dud. procureur du roy, disans que a ce
matin en son absence et d’autres plusieurs sergens ordinaires de lad. court et sans l’avoir fait
assavoir par cry publicq ne autrement, on a baillé au rabex a mener a Paris Jehan Legier, prisonnier
es prisons de la court de ceans, appellant de nous qui auroit esté adjugé a Huguet Petit, sergent
extraordinaire et qui n’est bailliager, a XLVII livres X s. t. A offert et offre ledict Bouchier mener
ledict Legier qui est encores esd. prisons a dix livres moins, a bailler cauction, requerant y estre
receu en ensuivant l’ordonnance et arrest de la court faitz et donnés le XXVII ^me jour d’aougst l’an
mil cincq cens et dix et cincquiesme de septembre l’an mil cincq cens-dix-sept. Par lequel Petit, a
ce present, a esté dit que l’adjudicacion dud. prisonnier avoit esté faicte sollemnellement en plain
auditoire de la court de ceans en presence des gens du roy et mis au moins offrant et au rabaiz en
ensuivant l’ordonnance, où s’estoient trouvez plusieurs personnes qui l’auroient mis a prix. Et
estoit led. Petit demouré ledict derrnier encherisseur ; luy avoit esté adjugé a baillé sa cauction
d’icelluy prisonnier, mener et conduyre en lad. court et de ce avoit fait diligence, quis chevaulx et
gens pour icelluy conduyre. Et estoit prest de monter a cheval et icelluy mener ; par quoy ne devoit
l’adjudication estre rescindée ne adnullee, protestans a tous despens, dommaiges et interestz pour
l’enpeschement qu’il luy fait de mener ledict prisonnier. Par lesdictz Brisson et Danyau a esté dit
qu’ilz conscentoient que led. Bouchier fust receu a lad. enchere. Parties oyes, avons receu led.
Boucher a lad. enchere. Par quoy est demouré ledict bail a XXXVII livres X s. ; ledict Petit l’a mis a
XXXV livres ; et led. Bouchier a XXX livres. Auquel prix de XXX livres l’avons adjugé aud.
Bouchier moiennant ce qu’il nous a promis le mener et conduyre en lad. court de parlement a Paris
et en apporter descharge vallable. Et pour seurté de ce nous a led. Bouchier baillé plege et cauction
Jehan Bouchier l’Aisné, sergent royal, lequel a ce present s’i est estably et a cauctionné ledict
Bouchier le Jeune de ladicte adjudicacion et promesse susdicte par ce que ledict Bouchier le Jeune
l’a promis garentir et desinteresser de tous dommaiges et interestz qu’il pourroit avoir a cause
dudict plegeaige, dont ilz et chacun d’eulx ont este jugez et condempnez par le jugement et
condempnacion de ladicte court. Et a tant avons deschargé et deschargeons ledict Petit et Andry
Pinpeau son plege de l’adjudicacion a luy faicte. Donné et fait en la court de la senneschaucée de
Poictou tenue a Fontenay le Comte par nous Barnabés Fouschier, licencié en loix, accesseur en
icelle, le unziesme jour de janvier l’an mil cincq cens dix sept.
B. FOUCHIER assesseur
J. GARNIER sergent royal, le greffier absent.

adjudication pour taxe de conduite de prisonnier adjugée au nommé Bouchier faite en la cour et baillage de Fontenay a la somme de xxxv l 35’’