1340, 8 novembre. Charte des pitanciers de l'abbaye de Saint-Germain-des-Prés
Dossier 15
| Texte original | |
|
A touz ceus qui ces p(rese)ntes l(ett)res verront . . Freres Guill(aum)e de Paris et Pierre de Soisi, pittanciers de l’eglise Saint Germain des Prez delez Par(is), salut . . Savoir faisons que p(ar) devant nous vint en sa p(ro)pre p(er)sonne Richart a l’Espee, demourant en la grant rue Saint Germain des Prez dessusdit devant l’eglise Saint Andry des Ars a Paris, si co(m)me il disoit. Liquiex Richars, tant en son nom [que] co(m)me p(ro)cureur de Agnés sa fame, se dessaisi (et) devesti en n(ost)re main co(m)me en main de seigneurs haus justiciers et tresfonciers, d’une maison et ses appertenances et appendances, no(m)mee et declarciee es lettres seellees du seel de la p(re)vosté de Paris p(ar)mi lesquelles ces p(rese)ntes sunt annexees. Laquelle maison et sesd(it)es appertenances lesdiz Richart et Agnés sa fame avoient vendue a rev(er)ent pere en Dieu mons. Pierres Bertram, par la grace de Dieu cardinal de la saincte Eglise de Ro(m)me, achetant non pas ou nom de sa dignité mais en son p(ro)pre (et) privé nom, pour lui, ses hoirs et ceus qui de lui ont ou auront cause ou temps a venir, pour le pris de quarante livres par(isis), si co(m)me il est plus plenement contenu es lettres dess(us) d(it)es. Et volt (et) accorda et nous requist instamm(en)t ledit Richart, ou nom que dit est, que de ladite maison et ses app(er)ten(ances) ledit acheteur feust par nous saisis (et) vestus. Laquelle dessaisine p(ar) nous receue, nous, de la volenté (et) assentem(en)t dudit Richart, ou nom que dit est, de la devant d(it)e maison et ses app(er)ten(ances) avons saisi et mis en saisine et poss(essi)on corporelle honorable ho(m)me Regnaut Le Paonnier, bourgois de Paris, tant co(m)me p(ro)cur(eur) dudit mons. le cardinal, p(our) ycelui cardinal, non pas ou nom de sa dignité mais en son p(ro)pre (et) p(r)ivé nom et pour le p(ro)ffit (et) usage d’icelui, sauf touz drois, si co(m)me il est de coustume gardee en tel cas. Liquelz p(ro)cur(eur) dudit mons. le cardinal nous a payé soixante six solz et huit deniers par(isis) qui nous estoient deüz des ventes. De laquelle summe pour la cause dess(us) d(it)e nous nous tenons a b(ie)n paiez et aggreez et en quittons lesdiz mons. le cardinal et son p(ro)cur(eur) et touz autres a qui quittance en puet app(er)tenir desorendroit a touz jours . . En tesmoin de laquelle chose, nous avons mis n(os)tre seel a ces p(rese)ntes l(ett)res, le mecredi huit jours de novembre l’an de grace mil CCC quarante. |