Sachent touz ceus ke ceste lettre verront e orront que jeo, Sanx du Mirayl, fiz de
Reymon de Mirayl, burgeys de La Riole, reconoys que je dey e leaument suy tenu a
Bernard Blank, burgeys de Blaye, en quinse mars de bons e leaus esterlings del coyn le rey
de Engletere, de peys et de conte, lesqueus le devant dit Bernard me presta en la cité de
Londres en bons deniers contanz pur mes bosoignes espleyter, dont je me tienc bien a
payé. Lesqueus XV mars d’esterlings avant nomez je promet leaument, en bone foy, de
rendre e payer a le devant dyt Bernard, ou a celuy qui ceste lettre portera, en la vile de
Burdeus le jour de seint Piere goule d’aust proceyn que vient en l’an de grace M CC IIII^XX
et tresze sanz nul delay e sanz nul contredyt ; e si le devant dit Bernard eyt perte ou
damage ou perde acune emplite ou face custs ou messions par ma defaute de cest
payement au terme avant nomé ne mie paié, je suy tenu et par ceste lettre obligé a rendre
e restorer a le devant dyt Bernard tous les pertes e damages et les emplites perdues et les
custs e les messions que il en avera eu, fet ou encurri par defaute de ladite summe
d’argent au terme avant dit ne mie paié. E a ce leaument fere je oblige a le devant dyt
Bernard, e a celi que ceste lettre portera, moy e mes heyrs e mes executeurs e touz noz
biens e noz chateus mobles e nient mobles, presenz e avenirs, ou que il seyent trovez, dela
la mer ou par desa, a destroindre par touz baillifs e viscontes de liu en qui poer que les
avant dyz biens seront trovez, et la que les XV mars d’esterlings avant nomez
ensemblement ove les choses avant dites a le devant dit Bernard, ou a celuy qui ceste lettre
portera, plenerement seyent parpaiez ; e je voyl e garant que ledit Bernard seu creu par sa
simple parole sanz autre prove de les pertes e damages de emplites perdues e de couz e de
messions que il avera eu par le devant dit payement audit terme nient paié. E a totes les
choses avant dites leaument fere e acomplyr enterement je ay juré sur les seinz ewangeles
Deu {ove} ma meyn destre que je ne faudray en nul point de les choses avant dites. En
testimoniage de verité de ceste chose, e que je ne peusse aler contre ceste lettre ne ceste
dette dedyre, a ceste lettre patente je ay mys mon seal pendant, laquele lettre fu fete en
Londres, le vendredi en la simene de Pentecost, en l’an de grace avant nomé.