Les gens des comptes et tresoriers du roy nostre seigneur a Paris, aus bailli de Caux
et vicomtes de Faloize et d’Auge ou a leurs lieuxtenans, salut. Par vertu des lettres royaulz
au transcript desquelles, collationné en la chambre desdiz comptes, ces presentes sont
attachees soubz l’un de noz signets, nous vous mandons et a chascun de vous, si comme a
lui appartendra, que des terme, respit et souffrance octroyez par le roy nostredit seigneur
a messire Roigier de Hallenvillier, chevalier, seigneur des Planches et de Saint Julien le
Foucon, de lui fere les foy et hommage que tenu lui est de fere a cause de sa terre et
seigneurie dudit Saint Julien le Foucon, dont lesdictes lettres font mencion, et aussi d’en
bailler son adveu ou denombrement par escript jusques au jour des Brandons prouchain
venant, vous souffrez et laissez ledit chevalier joïr et user paisiblement, sans lui mettre ou
donner aucun empeschement en icelle terre et seigneurie pour cause de foy et hommage
non faiz et denombrement non baillé ledit temps durant, pourveu toutesvoyes que ledit
chevalier premierement et avant toute euvre face le serement de feaulté es mains de vous,
bailli, et paie a vous, vicomtes, tous les autres droiz et devoirs pour ce deuz au roy
nostredit seigneur, et aussi qu’il n’y ait autre cause raisonnable d’empeschement pour
quoy faire ne le doyez ; laquelle, ou cas qu’elle y seroit, nous rescripvez feablement le plus
tost que vous pourez a fin deue. Donné a Paris, le XVI^e jour de septembre, l’an mil CCCC
et treize.

(Signé : ) J. de Paris.