Gié Ouedes, sires de Borbon, ainnez fiz le duc de Borgoine, faz a savoir a touz ceux qui
ces lestres verront que les covenances que misire Archembauz de Borbon e Yolenz sa
fenme avoient vers mon seignuer Gauchier de Chasteillon, seignuer de Saint Aignien en
Berri, des destes e des leis le conte Guion de Saint Paul, le pere a celui Gauchier, si com
elles sont contenues es lestres au devantdiz Archembaut e Yolent sa fenme e au lestres
mon seignuer Gauchier devantdit, gie tenrai e garderai, e promet a tenir e a garder por
moi e por Mahaut ma fenme, qui fu fille ainnee au devandiz Archembaut e Yolent. E ai mis
por moi en cest afaire mon seignuer Hugon de Chastiairs, e mon seignuer Raoul Brechart
chevaliers, e Barthelemi Baie, e maistre Johan de Rovrai clers, en tel maniere que li quatre
puent avant aler en cest afaire, ou li troi, ou li dui, ou li uns sues, toutes les foiz que li
autre n’i voudroient ou porroient estre. E vuil e otroi que li quatre que misire Gauchiers i
mist por soi en cest afaire devantdit, c’est a savoir misire Johanz de Molins, e misire
Guillaumes de Brion chevaliers, e maistre Renauz chanoines de Chartres, e maistres
Symons de Mepuicain, e li quatre desus nommé que gie i ai mis de par moi aient autant de
poer come il avoient au tans au devandiz Archembaut e Yolent sa femme e mon seignuer
Gauchier, sauf ce que l’en ne me puet riens demander de nul defaut qui aient esté ça en
arriers por eschoison de cest afaire. E en tesmoig de ces choses devandites, gie en ai faites
ces lestres saeller de mon sael. Ce fu fait a Vierson le samedi aprés feste saint Luc
euvangeliste, l’an de l’Incarnation noutre Seignuer mil dues cenz e cinquante.