Je Johanz, sires de Tile Chastial, faz savoir a touz que je ai repris en fié et en homaige
lige contre tous homes aprés l’evesque de Lyngres et lo duc de Bergoyne et aprés Johan,
conte de Bergoyne et segnor de Salins, tout ce que je hai a Jemeaus en fiés, en demeneures
et en aparteneences de mon chier seignor Thibaud, par la grace de Deu roy de Navarre,
de Champaigne et de Brie conte palazin, et de ses hoirs ; et ces choses sus je tenuz a faire
valoir deus cens liveres de tornois au moins. Et se nuns i demandoit {fié} ne autre
redevance, je li suz tenus a garentir come de franc aloy contre touz çaus qui a droit en
voroient venir. Et a ces choses tenir et assevir si come eles sunt dites desus, oblige je moy
et mes hoirs et tous mes [mes] biens moubles et nun mobles en quecunque leu que il soient
et pri et requier mon seignor le duc de Bergoyne que, se je ou men hoir veniens encontre
les devantdites choses outre aucune, que il les feist tenir moy et mes hoirs. Et aprés moi
ciez qui sera sires de Tile Chastial il doit estre hons audit roy de Navarre et ses hoirs dou
fié desus nomé ; et dou fié que je tien dudit Jehan, conte de Bergoyne et seignor de Salyns,
je ne cil qui sera sires de Tile Chastial ne puet estre hons devant la feauté ledit roy de
Navarre a hoir que lidis Jehans ait qui teine le conté de Bergoyne. Et por ce que ceste chose
soit ferme et estable, je ai mis mon saeel en ces letres, qui sunt faites en l’an de
l’Ancarnacion nostre Signor mil et deus cens et seixante et cinc, ou mois de setenbre.