Ludovicus, Dei gratia Francorum rex. Notum facimus universis tam presentibus quam futuris quod cum Radulphus de Suessionis miles, sicut datum est nobis intelligi, vendiderit et imperpetuum quittaverit integre Sancti Johannis in Vineis et Beate Marie ad moniales de Suessionis ecclesiis, videlicet utrique pro medietate, boscum suum quod vocatur boscum de Sicco Alneto, prout se comportat, trecenta et sexaginta arpenta vel circiter, ut dicitur, continens, contiguum ex una parte, ut dicitur, boscis nostris et boscis Roberti de Minciaco militis ex altera, movens etiam, ut dicitur, de feodo quod dilectus et fidelis noster comes Suessionensis tenet a nobis, pro quatuor milibus et centum libris turonensium, nos ad requisitionem prefati Radulphi militis, venditionem hujusmodi ratam habentes et gratam, eam quantum in nobis est volumus, et concedimus divini amoris intuitu quod predicte ecclesie, scilicet utraque pro medietate, predictum boscum, ut dictum est, venditum possint tenere imperpetuum et pacifice possidere absque coactione aliqua vendendi vel extra manum suam ponendi, salvo in omnibus aliis jure nostro et jure eciam in omnibus alieno Quod ut ratum et stabile permaneat in futurum, presentibus litteris nostrum fecimus apponi sigillum. Actum apud Sumydrium, anno Domini millesimo ducentesimo septuagesimo, mense mayo.