Philippus, Dei gratia Francorum et Navarre rex, senescallo Petragoricensi et Caturcensi aut ejus locumtenenti, salutem. Dilectus et fidelis noster Archambaudus comes Petragoricensis nobis fecit exponi, graviter conquerendo, quod, cum carissimus dominus et genitor noster dudum eidem comiti seu genitori suo castrum et castellaniam de Calciata cum omnibus pertinenciis, juribus, redditibus, redibenciis, justicia alta et bassa et omnibus aliis juribus que dicto domino et genitori nostro pertinere poterunt quomodolibet in premissis, superioritate et ressorto dumtaxat exceptis, tradiderit in recompesacionem [sic] vicecomitatuum Leomannie etAltivillaris, et licet dictus genitor noster in dictis castro et castellania cavalcatam haberet et eam interdum receperit, nichilominus habitatores dictorum castri et castellanie dictam cavalcatam prefato comiti solvere contradicunt indebite et injuste et contra predicte tradicionis tenorem. Unde mandamus vobis quatinus, si, visis litteris super dicta assignacione confectis, vocatis dictis habitatoribus, procuratore nostro et aliis evocandis, constiterit ita esse, dictam cavalcatam faciatis predicto comiti liberari et sine difficultate persolvi, prout fuerit racionis, ad hoc illos quos ad hoc teneri noveritis debite compellendo. Datum Parisius, die lune post Brandones, anno Domini M° CCC° XVI°