Introduction des cours Dossiers documentaires Bibliographies
1447, 26 mai. Mandement delphinal
Notice   •   Fac-similé interactif   •   Texte et traduction•  Commentaire diplomatique
Dossier 31

Passer la souris sur le texte pour obtenir des commentaires de détail

Loys, ainsné filz du roy de France, daulphin de Viennoys, conte de Valentinoys et de Dioys, a nostre amé et feal Girault Aymar, escuier, seigneur de Granhan, Salut et dilection. Comme par l'accort et traictié fait entre nous, d'une part, et vous, d'autre, sur le fait de l'eschange de la place, terre et seigneurie de Grillen a la terre et seigneurie de Marsenne et la moitié du peage de Laine et des empses de Savasse vous nous doiez presentement delivrer et mettre en noz mains ladicte place, terre et seigneurie de Grillen ensemble toutes les rentes et revenues, ainsi que par le traictié sur ce fait peut apparoir, savoir vous faisons que, nous confians a plain de la loyauté, souffisance et bonne preudomie de nostre amé et feal escuie r d'escuierie Hugues de Verdun, seigneur de Sainte Camelle, icelui avons commis et ordonné, commettons et ordonnons par ces presentes a prandre la possession, la garde et joïssance de ladicte place de Grillen, pour et en nostre nom, Si vous mandons et expressement enjoingnons que icelle place de Grillen avec toute la revenue, ainsi que ledit traictié le contient, vous lui baillez et mettez en ses mains pour et en nostre nom.Et en ce faisant nous vous en tendrons quitte et deschargé partout ou besoing sera, sans aucunement aller au contraire. Car ainsi nous plaist il et voulons estre fait. Donné au Monteil Aymart, le XXVIme jour de may, l'an de grace mil CCCC quarante et sept. Par monseigneur le daulphin en son conseil.

(Signé :) Bochetel (paraphe)