A toz ceus qui ces presentes leitres verront et orrunt, le ballif de Cotentin, salu. Sachez que, par devant nos establi, mon seignor Oliveir Avenel, chevalier, requenut que il est tenu a rendre a fin et a torjors au prior et au covent des nonains de Mortaing quatre livres et cinc souz de torneis de rente annel chescun an des ore en avant, a la feste saint Michel en setembre, que ledit chevalier lor a donné et aumorné en prope aumorne, por le salu de s’arme, a aver et a porseer ladite rente audit prior et au covent deudit chevalier ou de ses heirs, c’est a savoier sus son molin de Chalandreu, en tele meneyre que, se ledit chevalier poet trover ou il lor peust eschangier ladite rente dedenz un an en autre leu convenable ou il peusent fere lor justisse por ladite rente, il le porreit fere sanz contredit de iceus religios. Et se ledit Oliver ou ses heirs defalloient de paer ladite rente au terme devant nomé, ledit prior et le convent ou lor quemandement portant ces leitres porraint prendre le grant fer et le petit deudit molin, sanz contredit de icelui Oliver ne de ses heirs, juques a tant que eus fussent paez de lor rente. Et sunt tenuz ledit Oliver et ses heirs defendre et garantir ladite rente audit prior et au convent contre toz, et a eschanger en lor prope heritage, se mestier en estet. En tesmoing de laquele chose nous avon seelés ces presentes leitres deu seel de la ballie de Cotentin, oveuques le seel audit Oliver, sauf le droit nostre seignor le roi et autrui. Ce fu fait en l’an de grace mil dous cenz seissante et quinze, eu jor de mardi aprés la mé caresme.