Charles par la grace de Dieu roy de France, a noz amez et feaux les gens de noz comptes, tresoriers
de France au bureau des finances estably a Paris, esleuz sur le faict des aydes et tailles en l’election de
Soissons, salut. Veu la requete presentee en notre conseil le XXVII^e septembre dernier par Pierre
Terlan, fermier des huict et vingtieme du vin, boucherie, mercerie, poisson de mer, d’eaue douce,
tannerie, pelleterie, menu mestier, toille, chevaux, pied fourché, pastre, thuille, chaux et autres
impositions de la ville de Soissons tendant, en consideration des pertes par luy souffertes et la non
jouissance desd. fermes au moien des guerres, il nous pleust luy faire rabaiz et moderation des trois
quartz d’icelles, l’information faicte par les esleuz dud. Soissons desd. pertes et leur advis cy ataché,
ensemble la confirmation d’icelluy par vousd. tresoriers generaux, avons, de l’advis de notred. conseil
et conformement a celluy desd. esleus led. Terlan quitté et deschargé, quictons et deschargeons par ces
presentes de la moictié du pris et adjudication desd. fermes sans que pour l’advenir pour raison de ce
luy en puisse estre demandé aucune chose. Si vous mandons et ordonnons qu’en faisant led. Terlan
joir du contenu en cesd. presentes, vous aiez par le receveur des aydes dud Soissons et tous autres qu’il
apartiendra à le faire tenir quitté et deschargé des sommes a quoy se trouverront monter lesd
descharges. Et raportant par led. receveur sesd. presentes avec certifficat dud. Terlan, comme il ne luy
aura aucune chose paié pour raison de ce, voulons le tout estre passé et alloué en la despence des
comptes dud. receveur et rabatue de sa recepte par vous gens de nosd. comptes ausquelz mandons
ainsy a le faire sans difficulté, car tel est nostre plaisir.

Donné à Paris le XVIe jour de janvier l’an de grace mil cinq cens quatre-vingtz-dix et de nostre
regne le premier. Par le roy, au conseil estably prés monseigneur le duc de Mayenne lieutenant
general.

NICOLAS. #