Guillelmus, Dei gratia Cenomannensis episcopus, fidelibus universis, salutem. Nos, intelligentes quod veritas sub scripti actoritate tutius debeat observari, notum fieri curavimus Gilonem de Gorran pro salute anime sue et uxoris et antecessorum quandam terram suam que dicitur La Mehellee, que est juxta Erneiam, monachis Savigneii ad pitantiam in pane et vino et piscibus singulis annis percipiendam in perpetuam elemosinam liberam et quietam et ab omni servitio et consuetudine et exactione absolutam dedisse et concessisse. Hanc donationem concessit Guillelmus filius ejus primogenitus et sigilli sui actoritate munivit, eam tueri et defensare fideliter promisit, et pro hac concessione de caritate monasterii quatuor libras et decem solidos cenomannensium habuit. Hanc ipsam donationem concessit Henricus frater predicti Guillelmi, qui etiam de prefati monasterii caritate triginta solidos cenomannensium habuit. Hoc autem sciendum est quod sepedictus Guillelmus et Henricus frater ejus hanc donationem in manu nostra miserunt, de qua predictos monachos investivimus. Anno ab Incarnatione Domini M° C° LXXX°. Quod ut fidelius observetur, litteris annotari et sigilli nostri munimine fecimus confirmari. Hujus rei sunt testes Nicholaus decanus Beati Juliani, R. precentor, magister Ernaldus, magister B. capellanus, Stephanus, Ricardus, Hugo, monachi, et multi alii.