In nomine sancte Trinitatis, amen. Ego Lucdovicus, Dei gratia rex Francorum et dux Aquitanorum. Notum fieri volumus cunctis fidelibus tam futuris quam instantibus quod consilio et prece dominæ et matris nostræ Adelaydis reginæ et plurimorum hominum et fidelium nostrorum, domum quamdam et furnum in eadem domo quos Adelendis quæ Genta cognominatur, Parisius in Foro novo, in loco videlicet qui in suburbio Parisiensi Campellus appellatur, de suo proprio edificavit et construxit cum hospitibus in eadem domo manentibus nos eidem Gentæ perpetuo ita concedimus quod quilibet famuli aut ministeriales nostri ibi nullatenus manum mittant, sed et domus et furnus liberi omnino ab omni consuetudine et æxactione cum hospitibus ibi manentibus perpetuo existant neque ullo modo aliquis excepta predicta Genta ibi aliquid exigat aut potestatem aliquam ibi exerceat et eidem Gentæ et successoribus suis quicquid voluerint inde facere libere liceat. Precipimus etiam ut idem furnus ita in predicto foro et loco solus et unicus perpetuo habeatur quod nunquam a nobis neque ab alio aliquo furnus ibi alius ullatenus construatur. Quod ut perpetue stabilitatis optineat munimentum, presenti scripto memorie commendari et sigilli nostri actoritate et nominis nostri karactere corroborari precepimus. Actum Parisius, in palatio nostro, anno incarnati Verbi M° C° XXX° VII°, regni nostri IIIIto, astantibus in palatio nostro quorum nomina subtitula[ta] sunt et signa. Signum Radulfi Viromandorum comitis et dapiferi nostri. Signum Willelmi buticularii. Signum Hugonis constabularii. Signum Hugonis chamerarii. Data per manum Algrini (monogramme) cance-(monogramme)-larii.