Clemens episcopus servus servorum Dei, venerabili fratri . . episcopo Parisiensi, salutem et apostolicam benedictionem. Supplicationi qua dilecti filii magistri pauperes qui, in artibus adepti magisterii dignitatem, in theologica facultate student et in vico ad Portas ante palatium de Termis Parisius sub communi vita degunt, attenta instantia nos pulsarunt, benignum accomodantes auditum, fraternitatem tuam rogamus, et hortamur attente, quatinus magistris ipsis habendi oratorium in domo ipsa, in quo illi ex ipsis qui fuerint in sacerdotio constituti, aliis predictis magistris presentibus et audientibus, ac alii etiam ydonei capellani, quos ab ipsis magistris ad hoc requiri contigerit specialiter et vocari, cum opus fuerit, magistris eisdem divina officia celebrare possint, absque juris prejudicio alieni, ob nostram et apostolice Sedis reverentiam, licentiam quam habere postulant et affectant, si expedire videris, liberaliter largiaris, ut ex nostra intercessione, quam sibi efficaciter sperant prodesse, salubre suum in hoc propositum fuisse gaudeant adimpletum, et nos devotionem tuam dignis proinde laudibus prosequi debeamus. Datum Viterbii, III° kalendas aprilis, pontificatus nostri anno quarto.