Henricus, Dei gratia rex Anglorum et dux Normannorum et Aquitanorum et comes Andegavorum archiepiscopis, episcopis, abbatibus, comitibus, baronibus, justiciis, vicecomitibus, seneschallis, prepositis et omnibus baillivis et fidelibus suis totius terre sue salutem. Sciatis me dedisse in liberam et perpetuam elemosinam et presenti carta mea confirmasse Deo et abbatie de Oratorio locum de Baugezeis cum pertinentiis suis, ad construendum ibi abbatiam ordinis cisterciensis, et omnes alias donationes que rationabiliter facte sunt vel fient ipsi loco de Baugezeis. Quare volo et firmiter precipio quod predicta abbatia de Oratorio et eadem abbatia de Baugezeis locum predictum cum omnibus pertinentiis suis et omnes alias donationes que vel eis rationabiliter facte sunt vel fient et omnes rationabiles perquisitiones suas habeant et teneant bene et in pace, libere et quiete, integre et plenarie et honorifice, in bosco et plano, in pratis et pascuis, in aquis et molendinis, in vivariis et stagnis et piscariis, in viis et semitis et in omnibus aliis locis et aliis rebus ad eas pertinentibus, et cum omnibus libertatibus et liberis consuetudinibus suis. Concedo etiam ut monachi Deo servientes in abbatia de Baugezeis quieti sint et firmam pacem habeant per totam terram meam de theloneo et passagio et omni consuetudine ad me pertinente de omnibus propriis rebus suis et de pannagio propriorum porcorum suorum in boscis et forestis meis. Testibus Gaufrido Dure priore de Lochiis, Willelmo abbate de Daurata, fratre Rogero elemosinario meo, Stephano de Turonis seneschallo Andegavensi, Willelmo de Ostilli, Herveio de Muntbasun preposito de Lochiis. Apud Bellum locum juxta Lochias.